އަހަރެންގެ ތިލާވާކުރުން ރީތިކުރާނީ ކިހިނެތް؟

އަހަރެންގެ ތިލާވާކުރުން ރީތިކުރާނީ ކިހިނެތް؟

ފެށުން.
އަމިއްލަ ނަފްސާ ސުވާލުކުރުމަކީ އަޅުގަނޑުމެންގެ ތެރޭގައި އޮންނަން ޖެހޭ ވަރަށް މުހިންމު އާދައެކެވެ. އަބަދުވެސް ނަފްސު ހިސާބުކުރަން ޖެހެއެވެ. އެހެނީ އެއީ މާދަމާއަށްޓަކައި ކުރެވޭނެ އެންމެ ބުއްދިވެރި އަދި އެންމެ ބޮޑު ކަމެވެ. އިސްލާމްދީނުގައި އަމިއްލަ ނަފްސު ޙިސާބުކުރުމަށް ބާރުއަޅާފައިވެއެވެ. މާތްﷲ ކީރިތި ޤުރްއާނުގައި ވަޙީ ކުރައްވާފައި ވެއެވެ. “ وَلْتَنظُرْ نَفْسٌ مَّا قَدَّمَتْ لِغَدٍ “ މާނައީ ”އަދި ކޮންމެ ނަފްސެއްމެ، މާދަމާއަށްޓަކައި އިސްކޮށްފައިވާ ޢަމަލެއް ބަލާފާހުށިކަމެވެ.“ ( ޙަޝްރު18).
ކިޔަވާ ކުއްޖެއް ނުވަތަ ޢިލްމު އުނގެނޭ ކުއްޖެއްނަމަ މި ބީދާއިން ތިމާއަށް ދެވޭ މިޞްރާބާއި ތިމާ މިހާރު ހުރިހިސާބަކީ ކޮބާތޯ އަމިއްލައަށް ޙިސާބުކޮށް އަމިއްލަ ނަފްސާއި ސުވާލުކޮށް ބަލަން ޖެހެއެވެ. އެއީ ކުރިއަށް ދިއުމުގައި ކުރެވޭނެ އެންމެ މޮޅު އެންމެ ބުއްދިވެރި އެއްކަމެވެ. މިދެންނެވި ފަދައިން ޙިސާބުކުރާ ދަރިވަރެއް ނަމަ އެކުއްޖަކަށް ރަނގަޅު ބަދަލުތަކެއް އަންނާނެ ކަމަކީ ޝައްކެއް އޮތްކަމެއް ނޫނެވެ. އެހެނީ އެކުއްޖަކު އަމިއްލަ އައިބުތައް ރަނގަޅުކުރަން މަސައްކަތް ކުރާނެއެވެ.
އަޅުގަނޑުމެންގެ ތެރެއިން ވަރަށްގިނަ ޤުރްއާން އުނގެނޭ ދަރިވަރުންގެ ހިތުގައި އުފެދޭ ސުވާލެއް އޮވެއެވެ. އެހެނަސް އެ ސުވާލުގެ ޖަވާބު ގިނަ ދަރިވަރުންނަށް ދެނެގަންނަށް އުނދަގުލެވެ. އަދި އެކަމުގައި ދެން ޢަމަލުކުރަންވީ ކޮންގޮތަކަށް ކިހިނެތް ކަމާއިމެދު ސުވާލު އުފެދެއެވެ. ވާނީ ވެސް އެހެންތާއެވެ. އަހަރެން ޤާރީކޯސްތައް ހަދައިފީމެވެ. ނުވަތަ ޤުރްއާނުން ޑިގްރީއެއް ހަދައިފީމެވެ. މަޚްރަޖުތައް އިނގެއެވެ. ތަޖުވީދުގެ ޙުކުމްތަކާއި ޤުރްއާނާއި ގުޅޭ އެތައް މަޢުލޫމާތެއް އެބަހުއްޓެވެ. ނަމަވެސް އަމިއްލައަށް ރެކޯޑް ކޮށްލައިން އަހަރެންގެ ކިޔެވުން އަހަރެންނަށް އަޑުއަހާލަން ނުކެރެއެވެ. ނުވަތަ ލަދުގަނެއެވެ. ދެން އަހަރެންގެ ކިޔެވުން ނުވަތަ ތިލާވާކުރުން ރީތިކުރާނީ ކިހިނެތްހެއްޔެވެ؟

އަޅުގަނޑު މި ލިޔުމުގައި މި ބަލާލަނީ އަކުރުތަކުގެ މަޚްރަޖާއި، ތަޖުވީދުގެ ޤަވައިދުތައް އެނގޭ ކުދިންގެ ކިޔެވުން ރީތިކުރުމަށް ކުރެވިދާނެ ކަންތައްތަކަށެވެ. ނުވަތަ ކޯސްތައްހަދައި ނިމިފައި އިތުރަށް ކިޔެވުން ރީތިކުރުމަށް ކުރެވިދާނެ މުހިންމު ބައެއް ކަންތައްތަކަށެވެ.

1. ޢަމަލީގޮތުން ތަޖުރިބާ ކޮށްގެން.

ތިލާވާ ކުރުމަކީ ޢަމަލީ ކަމެކެވެ. ތިލާވާކުރުން ރީތިކުރެވޭނީ ޢަމަލީގޮތުން ތަޖުރިބާތަކެއް ކުރެވިގެންނެވެ. ނުވަތަ ލިބިގެންނެވެ. ދެން އުފެދޭ ސުވާލަކީ މި ތަޖުރިބާތައް ހޯދާނީ ކިހިނެއްހެއްޔެވެ؟ މި ތަޖުރިބާތައް ހޯދަން ކުރަންވީ ކޮންމަސައްކަތެއް ހެއްޔެވެ؟
މި ތަޖުރިބާ ލިބުމަށް ބޭނުންވަނީ ތަޖުރިބާހުރި ކިޔެވުން ރީތި އަދި ކިޔެވުމުގައި ޖެހޭ މައްސަލަތައް ޙައްލުކުރުމަށް، މައްސަލަޖެހެން މެދުވެރިވާ ސަބަބު ބުނެދީ މައްސަލަ ޙައްލުކުރަން ބުނެދޭން އެނގޭ މުދައްރިސުންގެ ގާތުން ކިޔެވުމާއި ، ރީތިކޮށް ކިޔަވައި ޤާރީންގެ ކިޔެވުން ގިނަގިނައިން އަޑުއެހުމެވެ. ދެން އެއަށް ފަހު ދަރިވަރުގެ މަސައްކަތް ތަކުރާރުކޮށްގެންނެވެ. މީގެ އިތުރުން ދަރިވަރުންނަށް ކިޔަވައިދީގެން ވެސް އިތުރު ތަޖުރިބާތައް ހޯދިދާނެއެވެ. އެއީ ދަރިވަރުންގެ ކިޔެވުމުގައި ހުންނަ މައްސަލަތައް ދެނެގަނެ، އެކަންކަމާއިމެދު ފިކުރުކޮށް ވިސްނައި ބަލައި، ދިރާސާކޮށް އެކަން ޙައްލުކުރާނެގޮތް ހޯދައިބަލައި ދެނެގަނެގެންނެވެ.

ކިޔެވުން ރީތި މުދައްރިސުން ގާތުން ކިޔެވުމަކީ އަކުރުތަކުގެ ރީތި ފުރިހަމަ އަޑު ދަސްވެ، ފިލިތަކުގައި ހަމަ ހިފެހެއްޓުމާއި، ސުކުންތަކާއި ތަޝްދީދުގައި ހޭދަވާ ވަޤުތުތައް ފުރިހަމަ ކުރާގޮތުގެ އަޑު ދަސްވާކަމެކެވެ. އަޅުގަނޑުމެން އިންސާނުން ކަންކަން ދަސްކުރާ މައިގަނޑު އޮންނަނީ 4 ގޮތެކެވެ. އެއީ ބަލައިގެން ، އަޑުއަހައިގެން ، ލިޔެގެން ނުވަތަ ކިޔައިގެން އަދި ހަށިގަނޑުގެ ޙަރަކާތްތަކެއް ކޮށްގެނެވެ. މީގެތެރެއިން ޤުރްއާން ކިޔަވަން (ތިލާވަތުކުރުން) ދަސްކުރުމުގައި މައިގަނޑު ބޭނުން ކުރާނީ އަޑުއެހުމެވެ. ނުވަތަ އަޑުއެހުމުގެ ޙިއްސެވެ. ޤުރްއާނަކީ އަޑުތަކެކެވެ. އަޑެއް އެންމެ ފުރިހަމައަށް ދަސްވާނީ އެއަޑެއް ގެންނަން ނުވަތަ އުފައްދަން އެންމެ ރަނގަޅަށް ދަންނަމީހެއްގެ ގާތުން އަޑު އަހައިގެންނެވެ. މިއީ އަޅުގަނޑުމެން އެންމެންވެސް ޤަބޫލު ކުރާ ޙަޤީޤަތެކެވެ. އަޑެއް ދަސްކުރާއިރު އެއަޑެއް އުފައްދަން ނޭނގޭ މީހެއްގާތުން އަޑެއް ދަސްކުރާނީ ކިހިނަކުންހެއްޔެވެ؟ އަޅުގަނޑުމެން ކަންކަން ދަސްކުރަނީ އަބަދުވެސް ނަމޫނާއަކަށް ބަލައިގެން ނޫންތޯއެވެ؟ ޤުރްއާން ރީތިކޮށް ކިޔެވުމަކީ ލިޔުމެއް ކިޔައިގެން ނުވަތަ ފޮތަކުން ޤަވައިދުތަކެއް ކިޔައިގެން ދަސްކުރެވޭނެ ކަމެއްނޫނެވެ.
ނުބައިވާ ސަބަބު ބުނެދިނުމަށްފަހު އެކަން ޙައްލު ކުރަން ބުނެދޭން އެނގޭ މުދައްރިސުންގެ ގާތުން ދަސްވާނީ ކިޔުމުގައި ނުބައިވި ގޮތް ދޫކޮށްލައި އައު ތަޖުރިބާއެއްކޮށް އައު އަޑު ދަސްކުރާށެވެ. އެފަދަމުދައްރިސުންގާތުން ކުރިއެރުން ލިބޭލެއް އަވަސްވާނެއެވެ. ސަބަބަކީ އެމުދައްރިސަށް ދަރިވަރު ގޯސްހެދީ ކިހިނެއްކަމާއި ގޯސްވީ ކޮންގޮތަކަށް ކަމާއި، މަޚްރަޖެއްނަމަ ޖެއްސިގޮތާއި ޖެހުނުތަނާއި، ރަނގަޅުގޮތަކީ ކޮބައިކަމާއި، އަކުރެއްގެ ޞިފައެއްނަމަ ޞިފަދިނުމުގައި އިތުރުވުން ނުވަތަ ފުރިހަމަނުވީ ސަބަބު ބަޔާންކޮށް ރަނގަޅުކުރާނީ ކިހިނެއްކަން ޔަޤީންކަމާއިއެކު ،ޙާލަތާއި ގުޅޭގޮތަށް ދަރިވަރަށް ބުނެދޭން އެނގޭނެތީއެވެ. އެފަދަ މުދައްރިސުންނަކީ މޫނު ބަލާ ލޯގަނޑެއްފަދަ މިޘާލެއްފަދަ ބައެކެވެ. މޫނުބަލައި ލޯގަނޑު ކައިރިހުރެ ރީތިވުމުން އަމިއްލައަށް ހެދޭގޯސްވަރަށް ރީއްޗަށް އަމިއްލައަށް ފެންނާނެ ނޫންތޯއެވެ. އޭގެ ސަބަބުން އަމިއްލައަށް މައްސަލަ ފެންނަޙާލު އެކަމެއް ރަނގަޅުކުރަން ފަސޭހަވެގެންދާނެއެވެ. އަދި މިޘާލަކަށް ބަލަމާހެއްޔެވެ. ޑަކުޓަރަށް ބަލި އެނގިގެން ބަލީގެ ސަބަބު ހޯދައިގެން ބަލިމީހާއާއި ގުޅޭ ފަރުވާދީ އަދި ބޭސް ދިނުމުން ބަލިމީހާ ރަނގަޅުވާލެއް އަވަސްވޭ ނޫންތޯއެވެ.
މިއާއި ޚިލާފަށް ދަރިވަރުގެ ކިޔެވުމުގައި ގޯސްވީކަން އެނުގުނަސް ގޯސްފާހަގަކުރި ނަމަވެސް ގޯސްވީ ކިހިނެއް، ކީއްވެކަން ނޭނގޭނަމަ އަދި ނުބުނެދޭނަމަ ނުވަތަ ރަނގަޅު ކުރާނީ ކިހިނެއްކަން ނޭގޭނަމަ އަދި ނުބުނެދޭނަމަ، ގޯސްވީކަމެއް ދަރިވަރުން ރަނގަޅުކުރާނީ ކިހިނެއްހެއްޔެވެ؟ ހުންއައުމުން ހުންއަންނަކަން އެނގުނަސް ހުންއަންނަ ސަބަބު ނުހޯދައި، ބަލިމީހާއަށް ފަރުވާދޭން ނުވަތަ ބޭސްދޭކަށް ޑަކުޓަރަކަށް ނޭނގޭނެ ނޫންތޯއެވެ؟ ބަލި މީހާއަށް ދޭނެ ބޭހެއް ނޭނގޭ ނަމަ ނުވަތަ ބޭހެއް ނުދޭނަމަ ބަލިމީހާ ރަނގަޅުވާނީ ކިހިނަކުންހެއްޔެވެ؟ ނުގުޅޭބޭހެއް ދިނުމަކުންވެސް ބަލިރަނގަޅެއް ނުވާނެ ނޫންތޯއެވެ؟ ކޮންމެ މީހަކަށްވެސް ހުންއައުމުން ހުންއަންނީކަން އެބައެނގެއެވެ. ޑަކުޓަރުން ކައިރިއަށްދަނީ އަވަހަށް ރަނގަޅުވާން ނޫންތޯއެވެ؟ ދިޔައިމައި ވީގޮތެއް އަދި ވާގޮތް ކިޔެއްތަ ކުރަންވީކަމެއް ނޭނގޭނަމަ ބަލި ރަނގަޅުނުވާ ފަދައިން ، ގޯސްވީ ކީއްވެކަން ބުނެނުދެވޭ ޙައްލުބުނެ ނުދެވޭ މުދައްރިސެއްގެ ގާތުން ދަރިވަރަށް ކުރިއެރުން އަންނާނެކަމަށް ޤަބޫލު ކުރުމަށްވުރެ މޮޔަކަމެއް ނޯންނާނެ ނޫންތޯއެވެ.
ރީތިކޮށް ކިޔަވައި ޤާރީންގެ ކިޔެވުން އަޑުއެހުމަކީ ރީތިރާގުތަކަށް ކިޔެވުމުގައި އަޑު ގެންގުޅެން ދަސްވާކަމެކެވެ. ޤުރްއާން ކިޔަވަން ދަސްކުރުމުގައި އަޅުގަނޑު ކުރީގައި ބަޔާން ކުރިފަދައިން އެންމެބޮޑަށް ބޭނުން ކުރާނީ އަޑުއެހުމުގެ ޙިއްޞެވެ. އަޑު އެހުމުގެ ޙިއްޞު ވަރުގަދަ، (Auditory Learners) އަޑުއަހައިން ދަސްކުރާ ކުދިންނަށް ރާގު ނަގައިގަންނަން ފަސޭހަވާނެއެވެ. އަދި އަޑުއަހާ ޤާރީގެ ކިޔެވުމުގައި ހުންނަ މައިގަނޑު ގޮތްތަކާއި އަދި ޚާއްޞަކަންކަން ނަގައިގަންނަށް ފަސޭހަވާނެއެވެ.
ކީރިތި ޤުރްއާން ރާގަށް ކިޔެވުމަކީ ހުނަރެކެވެ. ހުނަރެއް އެކަށީގެންވާ ވަރަކަށް ދަސްކުރުމަށް ޢާންމުކޮށް 20 ގަޑިއިރު ހޭދަވާނެކަމަށް ބުނާ މަޝްހޫރު ބުނުމެއް އޮވެއެވެ. އެއީ ހަފްތާއަކު ގާތްގަނޑަކަށް 4 ގަޑިއިރު އެކަމަށް ހޭދަކޮށްގެންނެވެ. “ ދަ ފަސްޓު 20 އަވަރސް: ހައު ޓު ލަރން އެނީތިންގ ފާސްޓް (2013) “ ގެ މުޞައްނިފްގެ ބަހުން، އައު ހުނަރެއް އެކަށީގެންވާ ވަރަށް ރަނގަޅުވުމަށް ބޭނުންވަނީ ގާތްގަނޑަކަށް 20 ގަޑިއިރުގެ އަމާޒުހިފެހެއްޓިފައިވާ، ވިސްނުންތެރި ޢަމަލީ މަސައްކަތެވެ. ކޯފްމަން ބުނާގޮތުން ހުނަރު ކުދި ބައިބަޔަށް ބަހައިލައިން ، ކުރު ނަމަވެސް އެއްގޮތަކަށް ތަކުރާރުކޮށް ތަމްރީނުކޮށް އަދި ސަމާލުކަން ގެއްލޭކަންކަން އެއްފަރާތްކޮށްގެން ، ފުރަތަމަ ދިމާވާ ހިންހަމަނުޖެހޭ ކަންކަމާއި ހުރަސްތައް ފަހަނައަޅައި، އަވަހަށް އެ ހުނަރު ބޭނުން ކުރެވޭ ފެންވަރަށް ވާޞިލްވެވިދާނެއެވެ. މި ޚިޔާލުން ހާމަވެގެން ދަނީ ފުރިހަމަ ފަންނުވެރިކަމަށް ގިނަ އަހަރުތަކެއް ހޭދަވާއިރު ހުނަރުގެ އަސާސީ ނުވަތަ ހުނަރު ބޭނުންކޮށްލެވޭ ވަރަށް ހުނަރެއް ތަރައްޤީކުރަން 20 ގަޑިއިރުގެ ތަމްރީނަކުންވެސް ރަނގަޅު ކުރިއެރުމެއް ލިބިދާނެކަމެވެ. ވީމާއި 2 ދުވަހުން ނުވަތަ 1 ހަފްތާގެ ކުލާހަކުން ކީރިތި ޤުރްއާން ރާގަކަށް ކިޔެވުމަކީވެސް ނާދިރުކަމެކެވެ.
މުޅިން އައު ރާގަކަށް ޤުރްއާން ކިޔަވަން ދަސްކުރަން ބޭނުންނަމަ އަޅުގަނޑުގެ ތަޖުރިބާގެ އަލީގައި 21 ދުވަހާއި 60 ދުވަހާއިދެމެދުގެ މުއްދަތެއް ބޭނުންވެއެވެ. ކޮންމެ ދުވަހަކު 20 މިނެޓާއި 30 މިނެޓާއި ދެމެދުގެ ތަމްރީނެއް ނުވަތަ ފަރިތަކުރުމެއް ޝައުޤުވެރިކަމާއި އެކު ބޭނުންވެއެވެ.
ދަސްކުރި ކަންކަމަށް އިތުރަށް ފިކުރުހިންގައި އަދި ދަސްވެފައިވާ ކަންކަމާއި ގުޅޭ ކަންކަމާއި، ގުޅުވައިގެން ދަރިވަރުން އެކަންކަން ތަކުރާރުކޮށް ކުރުމުން މި ތަޖުރިބާތައް ދާނީ އިތުރުވެ ކިޔެވުމަށް ކުރިއެރުން ލިބެމުންނެވެ. ހުނަރެއް އެންމެ ފުރިހަމައަށް ތަރައްޤީކުރަން އަހަރުތަކެއް ބޭނުންވެއެވެ. ރީތިކޮށް ކިޔަވާ ޤާރީންގެ ކިޔެވުން ރީތިވެފައި އަޑުއަހައިލަން ފަސޭހަވެފައި ވަނީ ކުރުމުއްދަތެއް ތެރޭގައި ނޫންކަން ދަނެ، ކެތްތެރިކަމާއިއެކު ލިބޭ ތަޖުރިބާގެ ޢަލީގައި މަސައްކަތްކުރުމުން ކޮންމެ ކުއްޖެއްގެ ކިޔެވުމަށްވެސް ކުރިއެރުން ލިބޭނެއެވެ.
ކިޔަވައިދީގެން އިތުރުތަޖުރިބާތައް ކުރެވޭ ސަބަބަކީ ކިޔެވުމުގައި ތަފާތު އެކި މައްސަލަތައް ހުންނަ ކުދިންނާއި ދިމާވެ، އެކަންކަން ރަނގަޅުކޮށްދިނުމަށް ތިމާއަށް މަޖުބޫރުވުމުން، އެކަންކަމާއިމެދު ފިކުރު ހިންގަން މަޖުބޫރުވުމެވެ. އަދި އަމިއްލައަށް އެކަންކަން ރަނގަޅުކުރަން މަސައްކަތްކުރަން މަޖުބޫރުވުމާއި، އެކި ގޮތްގޮތަށް ބުނެދޭން ޖެހުމުން އެކި ކުދިންނަށް ބުނެދީ ތަފާތު އުކުޅުތައް ދަސްވުމެވެ.
މުދައްރިސުން އަބަދުވެސް ކިޔަވައިދިނުމުގެ ތެރެއިން އިތުރު ތަޖުރިބާއާއި ހުނަރު ހޯދައެވެ. އެއީ ކްލާސްރޫމަކީ އަބަދުވެސް އުނގެނުމުގެ މާޙައުލަކަށްވާތީއެވެ. ކޮންމެ ފިލާވަޅަކުންވެސް އާ ގޮންޖެހުންތަކެއް ކުރިމަތިވެއެވެ. މިސާލަކަށް، ތަފާތު އުނގެނުމުގެ އުސްލޫބުތައް ބަލަހައްޓައި، ދަރިވަރުންގެ ސުވާލުތަކަށް ޖަވާބުދީ، އަދި ތަފާތު ޙާލަތްތަކާ ގުޅޭގޮތަށް ކިޔަވައިދިނުމުގެ ސްޓްރެޓެޖީތައް ބަދަލުކުރުން ހިމެނެއެވެ. ޝޯންގެ ރިފްލެކްޓިވް ޕްރެކްޓިސްގެ ނަޒަރިއްޔާ (1983) ގައިވާ ގޮތުން، ޕްރޮފެޝަނަލުން – މުދައްރިސުންވެސް ހިމެނޭގޮތަށް – އެމީހުންގެ ތަޖުރިބާ އިތުރުކުރަނީ ހަމައެކަނި އެމީހުންގެ މަޢުލޫމާތު ބޭނުންކޮށްގެން ނޫނެވެ. އޭގެ ބަދަލުގައި، ދުވަހުން ދުވަހަށް ލިބޭ ތަޖުރިބާތަކާމެދު ވިސްނައި ފިކުރުކޮށްގެންނެވެ. މިއިން ދޭހަވަނީ ކޮންމެ ކްލާހަކާއެކު، މުވާސަލާތުކުރުމުގެ ހުނަރާއި، ކްލާސްރޫމް މެނޭޖްކުރުމާއި، މައްސަލަ ޙައްލުކުރުމުގެ ހުނަރުތައް އިތުރަށް ރަނގަޅުކުރާކަމެވެ. މިގޮތުން އެމީހުންގެ ދައުރު އަދާކުރުމުގައި އިތުރަށް ހުނަރުވެރިވެއެވެ.
މީގެ އިތުރުން، ކިޔަވައިދިނުމުގެ ތެރެއިން އަބަދުވެސް މަސައްކަތްކުރަމުން ދިއުމާއި ބައިވެރިވުމުގެ ސަބަބުން، ނަފްސުގައި ހުންނަ މަޑުމައިތިރި ހުނަރުތަކާއި މާއްދާއާ ގުޅޭ މަޢުލޫމާތު އިތުރުވެއެވެ. ތަކުރާރުކޮށް ކަންކަން ކިޔައިދޭއިރު، ނަފްސުގެ އަމިއްލަ ދެނެގަތުން ވަރުގަދަވެ، މަޢުލޫމާތު ފޯރުކޮށްދިނުމުގެ ރަނގަޅު ގޮތްތައް ދެނެގަނެއެވެ. ޑާލިންގް-ހެމަންޑް އަދި ބްރެންސްފޯޑް (2005) ގެ ދިރާސާއިން ފާހަގަކުރެވުނު ގޮތުގައި ކިޔަވައިދިނުމުގެ ތެރެއިން ޕެޑަގޮޖިކަލް މަޢުލޫމާތާއި އިންސާނީ ގުޅުންތަކުގެ ހުނަރުތައް އިތުރުވެއެވެ. އެއީ މުދައްރިސުން ދަރިވަރުންނަށް ހިތްވަރުދޭން ދަސްކޮށް، އައު ގޮތްތައް ބޭނުންކޮށް، އަދި އެމީހުންގެ މަސައްކަތަށް ލިބޭ ފީޑްބެކް ބޭނުންކުރަން ދަސްކުރާތީއެވެ. ވަގުތު ފާއިތުވަމުންދާއިރު، މި ކިޔަވައިދިނުމާއި ވިސްނުމުގެ ދައުރުގެ ސަބަބުން މުދައްރިސުންނަށް އިތުރު ތަޖުރިބާ ލިބި، އިތުރަށް ހުނަރުވެރި އަދި ޙާލަތްތަކަށް ފަސޭހައިން ބަދަލުވެވޭ މުދައްރިސުންނަށް ވެގެންދެއެވެ.

އަޅުގަނޑުމެން ތަޖުރިބާގެ ވާހަކަ ދައްކާއިރު ހަނދާން ބަހައްޓަން ޖެހޭ ވަރަށް މުހިންމު ކަންކަން އެބަހުއްޓެވެ. އެއީ ތަޖުރިބާއަކީ ހަމަ ހުރެފައި ލިބޭ އެއްޗެއްނޫން ކަމެވެ. އަދި ތަޖުރިބާ ހޯދުމަށް އަމިއްލައަށް ކަންކަން ދިރާސާ ކުރުމެވެ. އަމިއްލައަށް ކަންކަމާއިމެދު ފިކުރުހިންގައި ކަމެއް ގޯސްވުމުން އެއީ ކީއްވެ، ކިހިނެއްވެގެން ވީ ކަމެއްތޯ ބަލައި އަމިއްލައަށް ދިރާސާ ކުރުމެވެ. މުދައްރިސަކު ކަމެއް ފާހަގަ ކޮށްދިނުމުން ނުވަތަ ގޯސްވެއްޖެކަން ފާހަގަ ކޮށްދީ، އަދި ގޯސްވީ ސަބަބު ބުނެދިނުމަށްފަހު މުދައްރިސް ބުނި ހިސާބުން ދޫކޮށްނުލުމެވެ. އަމިއްލައަށް އިތުރަށް ހޯދައި ބަލާށެވެ. އަދި ކިޔަވައިދޭ ދަރިވަރަކު ކުށެއް ކިޔުމުން އެކަންކަމާއިމެދު ވިސްނާ ފިކުރުހިންގައި އެކަން ދިމާވި ސަބަބު ދެނެގަނެ، ނުބައިކޮށް ކިޔުން ސަބަބާއި ރަނގަޅުކުރަން ކުރަންވީ މަސައްކަތް އެކި އުކުޅުބޭނުން ކޮށްގެން ބުނެދޭން މަސައްކަތްކުރާށެވެ. އޭގެ ސަބަބުން އިމިއްލަ ނަފްސަށް ކަންކަން އިޞްލާޙް ކުރެވެން ފަށާނެއެވެ.

އަދި ނުނިމޭ..

References

Kaufman, J. (2013). The first 20 hours: How to learn anything… fast. Penguin Group.

• Darling-Hammond, L., & Bransford, J. (Eds.). (2005). Preparing teachers for a changing world: What teachers should learn and be able to do. Jossey-Bass.

• Schön, D. A. (1983). The reflective practitioner: How professionals think in action. Basic Books.