ކިޔަވާ ކުއްޖެއް ނުވަތަ ޢިލްމު އުނގެނޭ ކުއްޖެއްނަމަ މި ބީދާއިން ތިމާއަށް ދެވޭ މިޞްރާބާއި ތިމާ މިހާރު ހުރިހިސާބަކީ ކޮބާތޯ އަމިއްލައަށް ޙިސާބުކޮށް އަމިއްލަ ނަފްސާއި ސުވާލުކޮށް ބަލަން ޖެހެއެވެ. އެއީ ކުރިއަށް ދިއުމުގައި ކުރެވޭނެ އެންމެ މޮޅު އެންމެ ބުއްދިވެރި އެއްކަމެވެ. މިދެންނެވި ފަދައިން ޙިސާބުކުރާ ދަރިވަރެއް ނަމަ އެކުއްޖަކަށް ރަނގަޅު ބަދަލުތަކެއް އަންނާނެ ކަމަކީ ޝައްކެއް އޮތްކަމެއް ނޫނެވެ. އެހެނީ އެކުއްޖަކު އަމިއްލަ އައިބުތައް ރަނގަޅުކުރަން މަސައްކަތް ކުރާނެއެވެ.

އަޞްލީ އަކުރުތަކަކީ އަލިފްބާގައި ހިމެނޭ 29 އަކުރެވެ. އެއީ ا އިން ي އަށެވެ.ފަރުޢީ އަކުރުތަކޭ ބުނެވެނީ އެއީ ދެ މަޚްރަޖެއްގެ ދެމެދުން ނުކުންނަ އަކުރުތަކާއި، ދެ އަކުރެއްގެ ދެމެދުން ނުވަތަ ދެ ޞިފައެއްގެ ދެމެދުން ނިކުންނައަކުރުތަކަށެވެ.

ޤުރްއާން ކިޔަވަން ފެށުމުގައި އިސްތިއާޛާ ( އަޢޫޛު ) ކިޔުމަކީ ނަމާދުގައި ވިޔަސް ނަމާދުން ބޭރުގައިވިޔަސް މުސްތަޙައްބު ކަމެއް ކަމުގައި ޖުމްހޫރު ޢިލްމުވެރިން ދެކިލައްވައެވެ.

ﷲ ސުބުޙާނަހޫ ވަތަޢާލާ ޖިބްރީލްގެ ފާނު މެދުވެރިކޮށް ރަސޫލުﷲ ޞައްލަﷲ ޢަލައިހި ވަސައްލަމްގެ މައްޗަށް ބާވާލެއްވި ސޫރަތުލް ފާތިޙާ އިން ފެށޭ ނާސް ސޫރަތައް ނިމޭ ކިޔެވުން އަޅުކަމެއް ކަމުގައި ލެއްވި، މުތަވާތިރިކޮށް އައިސްފައިވާ ﷲ ގެ ކަލާމް ފުޅެވެ.

ޤުރްއާން ކިޔެވުމުގެ ރީތިމަކަމާއި ކިޔެވުމުގެ އޮމާންކަން ގެނުވައިދޭ އެންމެ މުހިންމު ކަންކަމުގެ ތެރެއިން އެއްކަމަކީ ފިލި ފުރިހަމަކޮށް އެއްވަރުކޮށް ހަމަހިފެހެއްޓުމެވެ. ފިލި ފުރިހަމަ ކުރުމޭ ބުނެވެނީ  އެއްކިޔެވުމެއްގައި ފިލި އަދާކުރުމުގައި ފިއްޔަށް ދޭންވާ ވަގުތާއި އަނގައިގެ ހަރަކާތްތަށް އެއްވަރެއްގައި އެއް ހަމައެއްގައި ހިފެހެއްޓުމެވެ.

އަނގައިގެ ޙަރަކާތަކީ ޤުރްއާން ކިޔެވުމުގައި އެއް މިންގަޑެއްގައި ގެންގުޅެންޖެހޭ ކަމެކެވެ. އެކި ފަހަރު އެކި ވަރަށް ޙަރަކާތް ކުރުމަކީ ކިޔެވުމުގައި ހުތުރު ކަމެއް އެކުލެވިގެން ދާނެ ކަމެކެވެ.

އަކުރެއް އުފަންކުރުމުގައި އަކުރުގެ މަޚްރަޖުގައި ތަފާތު 3 ގޮތަކަށް އަޑު ބޭނުން ކުރެވެއެވެ.